إكتب يا قلم
ولا تكدب يا ألم
طلع الجرح إللى غاير بين الجروح
خرج الصورة إللى مكبوتة فوق فى السطوح
إوعى تنسى حق مظلوم فين يروح ؟
*•••••*•••••*•••••*•••••*•••••*•••••*•••••*
إتعلم الحق بين الحبايب والصحاب
إتكلم الكلمة الأصيلة
مهما يبقى الوقت غاب
ما تقولش يا ابنى إحنا شباب
والوقت بيننا فرفشة مش حصة عذاب
لأ دى الرجولة يا ابنى صفحة م الكتاب
*•••••*•••••*•••••*•••••*•••••*•••••*•••••*
بكتب الكلمة عارف إيه المعانى
مش بلمح عن فلان وهو حد تانى
والصراحة راحة والمفهوم معانى
ليه أحب لنفسى ويقولوا أنانى ؟
ده الغلط والصح ما بينهم ثوانى
ريح الخاطر وعافر حقق الأمانى
*•••••*•••••*•••••*•••••*•••••*•••••*•••••*
بالأصول يبقى الوصول أسهل كتير
بالمراوغة وبكلمة زايغة الصغير يصبح كبير
ليه نكابر بالغلط ونقول حقيقة
لو نراجع نفسنا بنفس الطريقة
رح نحدد خطنا وإللى نتمناه يكون مصير
عمرنا ما زرعنا الشر ونحلم إنه خير
*•••••*•••••*•••••*•••••*•••••*•••••*•••••*
المهندسين فى 5/1/2020
بالأصول : مقطوعة شعرية
من تأليفى : هشام إبراهيم على
الشهير : هشام على
*•••••*•••••*•••••*•••••*•••••*•••••*•••••*
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.